Martxoak, 24, barikua
19:00etan Eskolondon.
Jon Alonso Fourcade
1958 Iruñea
Biologian lizentziaduna, euskara irakaslea izandakoa, gaur egun itzultzailea da. 1995ean Mikel Zarate saria jaso zuen Idiaren eraman handia saiakeragatik. 2001ean, aurreneko Juan Zelaia saria irabazi zuen Agur, Darwin (eta beste arkeologia batzuk) lanarekin. 1995ean argitaratu zuen lehen nobela, Katebegi galdua, eta 1998an nobela eta saiakera artean dagoen Camembert helburu lana. Ondoren, Euskal karma rapsodia, Hodei berdeak eleberria eta Erretzaileen eremua ipuin liburua argitaratu ditu, besteak beste. Itzulpengintzan ere aritua da; berak euskaratu zuen Jose Samaragoren Lisboako setioaren historia edo eta Julio Cortazarren zenbait ipuin Julio Cortazar: Antologia apetatsua eta Jon Bilbaoren Kometaren eraginpean. Txalapartan Zintzoen saldoan eta Hiri hondakin solidoak eleberri beltzak argitaratu ditu. Beltzaren koloreak eleberri beltzari buruzko saiakera ere plazaratu du.
Amaiur bat urtero
Jon Alonso Fourcade 2022
Film handi bat egiten ari dira Baztanen. Amodiozko istorio gartsu bat da, orain dela 500 urte setiatua izandako Amaiurko gazteluan, Nafarroako erresuma menderatzeko gerran. Maitaleen desira eta ustekabeko heriotza bat dira Jon Alonsoren nobela berri hau azkartzen dutenak. Zinema giroaren xarma beti erakargarria gertatzen da kontakizun literarioan: fikzioaren ondoko errealitatea intrigaz pizten da, aktoreak bi bider bihurtzen dira protagonistak, arazo bitxiez konplikatzen da produkzioa.
Txalaparta
AMAIUR BAT URTERO
Batzuetan, liburu baten izenburua entzutean, badakizu ez dela zure gustukoa izango. Eta izenburu hori hau bezain anpulosoa bada, uste duzu ez zaudela oso jarria gaian, eta alde batera uzten duzu. Baina badira gomendatzen dizutenak eta… harra sortzen zaizu.
Nahiz eta AMAIUR hitzak gure imajinarioari garraztasunetik samurtasunetik baino gehiago ekartzen dion, Baztanen grabatzeko asmoa duten itzelezko filmak bi osagaien nahasketa bat izango du. Filmaketa abian da, eta argumentua AMAIUReko gazteluko horma sendoen artean sortutako erromantze baten ingurukoa da, setioaren garaian, 1522. urtean.
Ezbehar bat gertatzen da, eta filmarekin zerikusia duten pertsona garrantzitsu guztiek grabaketan gertatutakoari buruzko bertsioak ematen digute.
Ironia asko eta, batez ere, egoa erruz, lerro arteko irakurketa batera garamatzan kontakizun honetan.